Autoritetet kanë sekuestruar mbi 100 serverë dhe kanë kryer kontrolle në 17 ambiente në fazën e fundit të një operacioni ndërkombëtar kundër një rrjeti të dyshuar për mashtrime me investime online. Në Kosovë janë arrestuar shtatë persona, ndërsa ndaj tyre është kërkuar ekstradimi drejt Gjermanisë. Aksioni u koordinua nga autoritetet ligjzbatuese me mbështetjen e Eurojust dhe Europol.
Sipas Eurojust, grupi dyshohet se ka mashtruar qytetarë përmes skemave të investimeve në internet. Dëmet financiare llogariten në mbi 4 milionë euro. Serverët e sekuestruar dyshohet se kanë shërbyer për funksionimin e infrastrukturës teknologjike të rrjetit.
Hetimet kanë nxjerrë në pah edhe veprimtarinë e një kompanie me lidhje në Qipro dhe Izrael. Ajo dyshohet se u ofronte grupeve kriminale shërbime të gatshme për ngritjen dhe administrimin e platformave mashtruese. Skema funksiononte sipas modelit “Crime-as-a-Service” (krimi si shërbim), ku subjekte të specializuara u vënë në dispozicion grupeve kriminale teknologjinë, faqet e internetit dhe mjetet e nevojshme.
Dyshohet se klientë të kompanisë në Shqipëri, Kosovë dhe Maqedoninë e Veriut kanë përdorur qendra telefonike (Call Center) për të kontaktuar viktimat dhe për t’i orientuar drejt platformave të rreme. Përmes tyre, personat e përfshirë dyshohet se i bindnin qytetarët të investonin para, duke krijuar përshtypjen e përfitimit nga mundësi reale financiare.
Autoritetet e Kosovës kanë konfirmuar se aksioni u zhvillua në bashkëpunim me institucionet ndërkombëtare. Deri tani nuk janë publikuar të gjitha detajet për identitetin e të arrestuarve dhe për subjektet e kontrolluara në territorin kosovar. Hetimet vijojnë për të zbardhur mënyrën e funksionimit të rrjetit, përmasat e aktivitetit dhe rolin e personave e kompanive të përfshira.
