Plarent Ndreca, avokat i kryebashkiakut të Tiranës Erion Veliaj, pretendon se ministri i Drejtësisë Toni Gogu i ka shkuar klientit të tij në qeli të premten vonë në natë dhe i ka përcjellë një mesazh nga kryeministri Edi Rama. Sipas Ndrecës, këtë ia ka treguar vetë Veliaj.
Sipas avokatit, Gogu i ka thënë Veliajt se ka ardhur me porosi të kryeministrit dhe se do t’ia përcillte tekstualisht. Mesazhi pretendohet të ketë qenë se kjo është hera e fundit që Rama i drejtohet si “babai politik”, se Veliaj duhet të dorëzojë menjëherë mandatin dhe të delegojë pushtetin te emrat që do të caktohen prej tij. Ai duhej të hiqte dorë edhe nga avokati Ndreca. Në të kundërt, sipas pretendimit, do të transferohej në burgun 302, ndërsa SPAK-u do të orientohej të niste hetime për minim të rendit kushtetues.
Ministri Gogu e ka pranuar takimin me Veliajn, por jo mesazhin. Ai ka thënë se ka shkuar si mik i tij dhe si ministër, për t’u njohur me shqetësimet që kryebashkiaku kishte.
Në komentin e botuar, thuhet se Prokuroria e Posaçme duhet të nisë hetime kryesisht mbi deklaratën e avokatit dhe të marrë në pyetje Gogun e Ramën si persona në dijeni. Sipas tij, bëhet fjalë për vepra të mundshme penale si shantazhi apo cënimi i rendit kushtetues, jo për deklarata politike. Nëse pretendimet vërtetohen, Rama dhe Gogu rrezikojnë dënim nga 3 deri në 7 vite burgim për shantazh, kërcënim dhe shpërdorim detyre.
Në rast të kundërt, vlerësohet se Veliaj mund të përballet me një akuzë shtesë, pasi sipas “mesazhit” ai duhej të heshtte ose do të hetohej për cënim të rendit kushtetues. Gogu përshkruhet si mik i kahershëm i Veliajt dhe jurist në profesion.
