Kryebashkiaku i Tiranës, Erion Veliaj, ka publikuar përgjigjet që thotë se ia ka dhënë ministrit Toni Gogu gjatë një bisede në burgun e Fierit. Në to ai shpreh pakënaqësi për transferimin, kushtet e izolimit dhe pretendon se ka ndërhyrje në drejtimin e Bashkisë së Tiranës.
Veliaj e konsideron kalimin nga burgu i Tiranës në atë të Fierit një mënyrë për ta ndarë nga familja dhe për ta vënë nën presion. Ai i thotë Gogut se nuk e sheh si autor të vendimit, por si përcjellës të një mesazhi, ndërsa përgjegjësinë politike ia faturon drejtpërdrejt kryeministrit Edi Rama.
Në mesazhe ai pretendon se kryeministri po përpiqet ta frikësojë përmes izolimit. “Jo këtu, po në Spaç të më çoni 100 vjet, nuk më përkulni dot. Ta harrojë R.”, shkruan Veliaj.
Ai ngre gjithashtu pretendime për komunikime mes kryeministrit dhe prokurorëve lidhur me akuzat ndaj tij dhe dënimin e mundshëm. Veliaj e quan të papranueshme atë që e përshkruan si negociim për numrin e akuzave dhe vitet e burgut.
Për protestat, Veliaj mohon kategorikisht se i ka organizuar apo financuar ato, qofshin protestat e studentëve apo lëvizja e quajtur “Flamingot”. “Unë nuk jam organizator e financues as i Flamingove, as studentëve. Këto janë gjepura si në kohë të Enverit! Ku është katandisur shteti, gjeti armikun e brendshëm”, shprehet ai. Po ashtu, i cilëson absurde akuzat se ka nxitur përmbysjen e rendit kushtetues nga burgu dhe thotë se nuk tërhiqet nga postimet e tij për UÇK-në, Hashim Thaçin dhe presidentin serb Aleksandër Vuçiç.
Në pjesën e dytë, Veliaj deklaron se nuk do ta delegojë më drejtimin e Bashkisë së Tiranës, duke iu referuar 18 muajve kur, sipas tij, nuk e ushtroi vetë funksionin. Ai pretendon se në atë kohë nuk pati investime të rëndësishme dhe u bllokuan projekte, përfshirë shkolla, kredi të buta dhe financime ndërkombëtare. Pas rikthimit, thotë se u zhbllokuan gjashtë shkolla dhe u dhanë mbi 1.500 kredi të buta.
Kryebashkiaku argumenton se mandati i tij vjen nga vota e qytetarëve, rreth 160 mijë, dhe nga vendimi i Gjykatës Kushtetuese. Ai kritikon emërimet në administratën bashkiake dhe vlerëson pozitivisht Etlevën, Sadin e Sarën. Për Arbrin thotë se nuk e quan person me probleme, por se nuk do t’ia delegojë më drejtimin e bashkisë.
Në pjesën e tretë, Veliaj flet për përgjigjet që i ka dhënë personit që identifikon si Plaro. Ai pretendon se për rreth 20 muaj nuk i është lejuar të ketë këshilltarë të tjerë dhe vë në pikëpyetje rolin e kryeministrit në vendimet për qelitë, takimet dhe vizitat mjekësore.
Sipas tij, takimi me Plaron zgjati deri në mesnatë, ai mori dy libra dhe u rikthye në qeli me paterica pasi u larguan miku dhe drejtori i burgut. Veliaj thotë se i ka përcjellë urimet, por ka refuzuar çdo propozim që e konsideron përfshirje në afera të paligjshme. Të gjitha këto janë pretendime të paraqitura nga vetë Veliaj.
