Zëvendësdrejtori i Doganave, Erald Delilaj, akuzohet nga denoncues për presione ndaj subjekteve tregtare dhe përfitime të dyshuara të paligjshme. Sipas tyre, që nga maji janë depozituar mbi 10 ankesa në SPAK dhe në struktura të tjera ligjzbatuese, me fokus punën në Doganën e Durrësit dhe atë të Kapshticës.
Denoncuesit kërkojnë që institucionet kompetente të verifikojnë rastet dhe të përcaktojnë nëse ligji është shkelur. Pretendimet nuk janë verifikuar në mënyrë të pavarur dhe nuk ka dokumente zyrtare që t’i konfirmojnë.
Sipas denoncimeve, bizneset që sjellin mallra me furgona nga Britania e Madhe janë përballur me kërkesa për rreth 500 euro për çdo automjet. Në raste të tjera, shumat e kërkuara pretendohet se kanë qenë dukshëm më të larta.
Akuzat përmendin edhe dërgesa me pije energjike Red Bull, cigare elektronike dhe produkte të tjera, që pretendohet se janë importuar në kundërshtim me kërkesat ligjore dhe të dokumentacionit. Për to flitet për shuma nga 8 mijë deri në 10 mijë euro për kamion.
Një çështje tjetër lidhet me shkatërrimin e mallrave në Durrës, të paraqitura si të dëmtuara. Për katër kontejnerë pretendohet se procesi është shoqëruar me pagesa të dyshuara prej rreth 150 mijë eurosh. Denoncuesit kërkojnë verifikimin e dokumentacionit, të procedurave dhe të personave përgjegjës.
Denoncimet prekin edhe vlerësimin doganor të automjeteve nga SHBA-ja. Dyshohet se në disa raste vlera e tyre është ulur deri në mbi 50 për qind gjatë zhdoganimit, ndërsa për disa mjete pretendohet se janë kërkuar rreth 200 euro. Kërkohet krahasimi i faturave të blerjes, vlerave të deklaruara dhe vendimeve të punonjësve.
Sipas denoncuesve, disa punonjës dhe agjenci doganore kanë qenë nën presion dhe kanë hezituar të raportojnë shkelje nga frika e transferimeve apo masave administrative. Pretendohet gjithashtu se raste me shkelje të mundshme janë mbyllur pa u ndjekur më tej, ndaj kërkohet shqyrtimi i hetimeve të brendshme dhe i ankesave të biznesit.
Denoncimet janë drejtuar te SPAK, prokuroritë në Durrës e Tiranë dhe institucione të tjera, përfshirë Kryeministrinë. Deri në paraqitjen e dokumenteve zyrtare, akuzat ndaj Delilajt dhe të tjerëve nuk janë fakte të provuara, dhe nuk ka të dhëna të verifikuara për vendim arrestimi ndaj tij.
