Ministri i Financave, Petrit Malaj, bëri të ditur në Komisionin e Ekonomisë se qeveria po rishikon edhe një herë ligjin për bastet sportive online, ndaj nisja e operimit pritet të shtyhet. Ligji u miratua në shkurt të vitit 2024, por më shumë se dy vite më pas gara për 10 licencat nuk është hapur.
Çështja e informalitetit në treg u ngrit nga Igli Cara, i cili theksoi mungesën e të ardhurave për buxhetin e shtetit. “Prej 7 vitesh në buxhet të shtetit nga bastet nuk ka fituar, nuk i keni të ligjëruara, dhe sot është plotësisht informal dhe të gjithë këtë faturë po ja faturoni biznesit të ndershëm”, deklaroi ai.
Malaj pranoi se kuadri ligjor dhe aktet nënligjore janë përfunduar. “Ne kemi mbaruar të gjithë kuadrin ligjor sa i përket basteve online, VKM-të respektive”, tha ministri. Sipas tij, ligji rishikohet për një mbikëqyrje të kujdesshme dhe për të shmangur probleme sociale, ndërsa lojërat e fatit do të fillojnë pas përfundimit të rishikimit.
Në shkurt 2024 mazhoranca miratoi rikthimin e basteve sportive vetëm në formatin online, me një treg të kufizuar prej 10 licencash dhe me identifikim të pjesëmarrësve përmes dokumenteve të identitetit. Pikat fizike të basteve ishin mbyllur më 1 janar 2019.
Ministri nuk sqaroi nëse rishikimi do të prekë numrin e licencave, kriteret e përzgjedhjes, detyrimet financiare apo vetëm mekanizmat e kontrollit. Nëse nevojiten amendamente, ato duhet të kalojnë edhe në Kuvend, ndërsa Ministria e Financave nuk ka caktuar ende një datë për fillimin e operimit.
Deri atëherë, 10 licencat mbeten pa konkurrim, ndërsa aktiviteti i basteve vazhdon jashtë sistemit të licencimit dhe shteti nuk mbledh të ardhura nga operatorë të ligjshëm.
