Policia në qytetin malazez të Kotorit ka ndaluar një autobus dhe një furgon me nxënës të gjimnazit “Naim Frashëri” të Durrësit, që ndodheshin në një udhëtim turistik në Mal të Zi. Në mjete ishin nxënës të mitur dhe mësues shoqërues, të cilët janë mbajtur për disa orë në ambientet policore.
Në fillim, familjarëve nuk u ishte bërë e ditur arsyeja e ndalimit. Ata kanë kërkuar ndihmën e Ambasadës Shqiptare në Mal të Zi dhe të institucioneve arsimore në Durrës.
Më pas është marrë një informacion tjetër, sipas të cilit ndalimi dyshohet se lidhet me një incident me disa nxënës. Sipas këtij pretendimi, tre prej tyre kanë bërë gjestin e shqiponjës me duar, ndërsa një nxënës tjetër dyshohet se është përfshirë në një përplasje me një grua malazeze, e cila ka njoftuar policinë.
Sipas informacioneve të fundit, pjesa më e madhe e grupit ka dalë nga komisariati dhe është nisur drejt hotelit. Katër nxënës dhe një mësuese raportohet se vazhdojnë të jenë në ambientet e policisë në Kotor.
Deri tani nuk ka konfirmim zyrtar për rrethanat e incidentit dhe për arsyen e saktë të ndalimit. Kërkohet reagim nga Ambasada Shqiptare në Mal të Zi, Ministria për Evropën dhe Punët e Jashtme, autoritetet policore malazeze dhe Drejtoria Arsimore në Durrës, për të sqaruar çfarë ka ndodhur dhe pse nxënësit e mitur janë mbajtur për kaq shumë orë.
