Bordi i Transparencës ka vendosur një rishikim të ri të çmimeve të karburanteve. Nafta është ulur me 6 lekë dhe do të shitet 212 lekë për litër, ndërsa çmimi i benzinës mbetet i njëjtë, 179 lekë për litër.
Vendimi u mor në mbledhjen e datës 31 tetor 2026, në bazë të Vendimit të Këshillit të Ministrave nr. 711, datë 16.09.2026, për shpalljen e situatës së veçantë në tregun e hidrokarbureve. Bordi iu referua edhe neneve 21/3 dhe 21/5 të Ligjit 8450 për përpunimin, transportimin dhe tregtimin e naftës, gazit dhe nënprodukteve të tyre, si dhe Aktit Normativ nr. 1, datë 3.4.2026, për akcizat.
Për gazoilin e standardit SSH EN 590, çmimi i shitjes me pakicë nuk duhet të kalojë 212 lekë për litër, ndërsa ai me shumicë 200 lekë për litër. Për benzinën, çmimi me pakicë është jo më shumë se 179 lekë për litër dhe me shumicë jo më shumë se 167 lekë për litër.
Çmimet e reja hynë në fuqi më 31 tetor në orën 12:00 dhe vlejnë deri në mbledhjen e ardhshme të bordit, ku do të pasqyrohen ndryshimet e tjera.
Bordi tërhoqi vëmendjen e operatorëve të shitjes me shumicë dhe pakicë për detyrimin e zbatimit të vendimit. Në rast shkeljesh të konstatuara, do të vendoset pezullimi i aktivitetit.
Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë janë angazhuar të mbrojnë interesat e konsumatorëve shqiptarë dhe parimet e konkurrencës së ndershme në treg.
