Rrjeti i call center-ave që synon qytetarë europianë me investime fiktive në Forex dyshohet se ka bërë mashtrime me vëllim mbi 100 milionë euro. Shifrën ua atribuojnë burimet policore, e cila, sipas informacionit, përfshin qarkullimin e pretenduar dhe jo një fitim neto të dokumentuar. Florian Sula dhe Flladi Malaj identifikohen si dy organizatorët kryesorë të dyshuar.
Sipas denoncimit, të ardhurat kanë ushqyer një varg biznesesh, pronash dhe investimesh, ku dyshohet se janë përdorur prestanome për të mbuluar përfituesit realë. Gjurmët nga zyrat në Tiranë çojnë te kompani marketingu, agjenci imobiliare, industria minerare dhe turizmi bregdetar.
Më 22 shtator 2023, operacioni “Momentum” goditi një call center me rreth 60 punonjës. U arrestuan dy administratorë dhe u sekuestruan 68 mijë euro. Në qershor 2026, operacioni “End Point” përfundoi me shtatë arrestime, 27 persona të proceduar dhe sekuestrimin e 70 kompjuterëve e 49 celularëve.
Bjorn Kareco dhe Marjo Kolli rishfaqen në informacionet për të dyja operacionet, ndërsa Flladi Malaj përmendet si kontrolluesi i dyshuar i aktivitetit të tyre. Pas tre vitesh dhe dy operacionesh, hetimi financiar i bërë publik nuk ka thënë se kush i përfitoi miliona eurot e qarkulluara.
Në tetor 2019 Malaj regjistroi Momentum Group, që ka kontrolluar Dekript Media Group dhe Akademia Profesioneve M&G. Në INFO TIRANA kishte 50% të kapitalit, gjysmën tjetër e kishte Taulant Ahmetaj. Ai kishte edhe 80% të ACME Studio, së bashku me Xhorxh Xhanin, ndërsa në dhjetor 2019 bleu Albreeze nga Albes Lazaj dhe Momentum Optimo për 3 milionë lekë, rreth 30 mijë euro.
Momentum Group, ACME Studio dhe Albreeze kanë të njëjtën referencë historike pasurie në Selitë, në Rrugën Prokop Mima. Selita dhe Komuna e Parisit përmenden në informacionet policore si zona ku kanë funksionuar zyra call center-ash.
Emri i Malajt shfaqet edhe në historikun e MEB 2018 Skorje, kompani e lidhur me ish-Uzinën e Shkrirjes së Bakrit në Kukës, ku figurojnë edhe Bastri Malaj, Erion Berberi dhe Megan Malaj. Të ardhurat e saj u rritën nga 167 mijë lekë në 2021 në 35,3 milionë lekë, rreth 350 mijë euro, në 2023. Në prill 2026, dy muaj para “End Point”, Malaj regjistroi FLLAD COLLECTION në Radhimë, me kapital 6,5 milionë lekë dhe në pronësi të plotë të tij, me objekt hotele, vila, restorante e shërbime turistike.
Sula përshkruhet si një nga drejtuesit kryesorë të mashtrimit, përkrah Malajt. Dyshimet shtrihen te investimi i parave në pasuri të paluajtshme dhe projekte turistike, përfshirë toka e projekte nga Borshi në Himarë. Në mars 2026 ai u mor peng në Tiranë dhe u dërgua në Xhafzotaj, ku rrëmbyesit kërkuan fillimisht dy milionë euro. Për ngjarjen u arrestuan Hysen, Kevin dhe Jurgen Neza.
Në prill 2025 u themelua ARKA HOME, kompani imobiliare ku Xhuljano Malaj ka 35% të kapitalit dhe Katerina Berberi 30%. Në denoncim përmendet edhe Fisnik Begollari, broker në CENTURY 21 Partners, të cilit i atribuohet një vilë mbi një mijë metra katrorë pranë liqenit të Farkës, me vlerë të pretenduar mbi 1,5 milionë euro. Sipas informacionit policor, ai dyshohet se ka pasur marrëdhënie me aktivitetin e Sulës dhe Malajt.
Shtetasi A. Koxhaxhiku përmendet për lidhje me Rolex Bar, makina me qira, lavazhe dhe pasuri të paluajtshme, ndërsa R. Prifti nga Elbasani paraqitet si bashkëpunëtor. Informacioni flet edhe për një konflikt të dyshuar për pagesa në kriptovaluta, të lidhur me një plagosje në 2026. B. Kuca dhe D. Daliu dyshohen për menaxhimin e zyrave dhe administrimin e aktivitetit, ndërsa në listën e bizneseve figuron edhe BelleVue Dental Care.
Policia ka sekuestruar 68 mijë euro në 2023 dhe pajisje elektronike në 2026, ndërsa denoncimi flet për aktivitet mbi 100 milionë euro. Pyetja që mbetet pa përgjigje është kush i arkëtoi paratë, ku përfunduan dhe në emër të kujt u investuan.
